A lei do mar

    Neste 2º trimestre o club de lectura de 4º ESO traballlou arredor da obra de Manuel Esteban A lei do mar. A proposta nesta ocasión consistiu na lectura do libro e a visualización posterior da súa adaptación en serie, co obxectivo de favorecer a comprensión crítica e a comparación entre ambos formatos. 

    En primeiro lugar, realizouse unha posta en común breve na que se lembraron os elementos principais da obra, como os personaxes, os conflitos e o papel simbólico do mar, ademais de formularse unha pregunta inicial para activar expectativas sobre a adaptación.

    Despois procedeuse ao visionado de fragmentos seleccionados, durante o cal o alumnado se centrou nas diferenzas respecto ao libro e na forma de transmitir a atmosfera e as emocións da historia.

    Posteriormente, realizouse un debate no que se compararon ambas versións, analizando as diferenzas máis relevantes, a fidelidade á obra orixinal e a transmisión da mensaxe principal.

Burbullas de calma serena

 

No club de lectura de 2º ESO seleccionamos, para este 2º trimestre, a obra Burbullas de calma serena.

Organizamos entre o alumnado un debate sobre o papel das emocións na novela e os principais conflitos presentes na trama. A continuación, identificáronse os personaxes principais e comentáronse as situacións máis significativas, rematando cunha posta en común das ideas principais e das emocións que lles suscitou a lectura.

Comerás flores

 Proposta de actividade no club de lectura de 4º ESO despois da lectura da obra:

•  Lectura da primeira frase do libro e posta en común das primeiras impresións do alumnado sobre o impacto do duelo na protagonista.

• Análise de como a dor pola perda do pai deixa a Marina nun estado de desamparo e exposta á irrupción de Jaime.

•  Debate sobre a diferenza de idade e as estratexias de manipulación para desmontar o mito do amor romántico.

• Foco no personaxe de Diana e na importancia da amizade como a rede de apoio fundamental para a protagonista

• Dinámica de Peche: post-its de dúas cores para contrapoñer os xestos que ao principio parecían "atentos" coa realidade de control que agochaban despois.

A lavandeira de San Simón

     Realizouse unha actividade de lectura compartida co alumnado de 1º ESO do club a partir da obra A lavandeira de San Simón, desenvolvida tras a visualización da película San Simón no cine de Seixo no 1º trimestre do curso. A proposta permitiu establecer unha conexión entre o relato literario e o contexto histórico da illa de San Simón.

  A lectura deste libro resultou especialmente interesante para o alumnado, xa que permitiu resolver moitas das dúbidas que xurdiran tras o visionado previo da película relacionada coa obra. A través da lectura puideron comprender mellor os feitos narrados, afondar nos personaxes e descubrir detalles que non aparecían na adaptación audiovisual. Ademais, a actividade deu lugar a conversas e reflexións compartidas que axudaron a interpretar os acontecementos e a contextualizar mellor o momento histórico no que se desenvolve a historia.

Mi hermana vive sobre la repisa de la chimenea

 

      O alumnado de 2º de ESO participou nun club de lectura arredor do libro Mi hermana vive sobre la repisa de la chimenea, da escritora Annabel Pitcher. Durante a sesión compartiron a súa opinión sobre a lectura e expresaron os sentimentos e emocións que espertou neles a historia. A continuación, sacaron distintos obxectos dun carriño da compra e asociaron cada un deles aos diferentes personaxes do libro, reflexionando sobre o seu significado. Para rematar a sesión, e tomando como punto de partida un fragmento do libro, traballaron en pequenos grupos na creación dunha nova historia, uns encargáronse de elaborar o nó, mentres que outros imaxinaron o desenlace. Nunha fase posterior, xuntarase o traballo de todos os grupos para dar forma a unha nova narración colectiva creada a partir da lectura compartida.

El curioso indidente del perro a medianoche

 

Para a 1ª xuntanza do club de lectura de 3º ESO seleccionamos a obra El curioso incidente del perro a medianoche, a partir da cal se realizaron diferentes actividades de comprensión, reflexión e expresión creativa. O alumnado participou nun debate inicial no que se comentaron as primeiras impresións sobre a narración e sobre a forma de percibir o mundo a través do protagonista.

Posteriormente, realizouse unha actividade de empatía na que se analizaron situacións da vida cotiá desde a perspectiva do personaxe principal, o que permitiu reflexionar sobre a diversidade e as distintas formas de interpretar a realidade. Desenvolvéronse tamén debates sobre a confianza e as relacións familiares, que xeraron un interesante intercambio de opinións entre o alumnado. 

Finalmente, realizouse unha posta en común de fragmentos significativos, o que permitiu compartir as distintas interpretacións do alumnado.

Adeline

     No 3º trimestre, en 1º ESO, lemos Adeline, unha homenaxe moderna de María Solar a Carmilla, o primeiro clásico de vampiros.

    Tras a lectura da obra lanzáronse as seguintes preguntas sobre a obra para establecer un debate:

• Que parte do libro che pareceu máis dura?
• Se puideses falar con Adeline, que lle dirías?
• Cres que é importante contar historias como esta? Por que?
• Que valores transmite a historia de Adeline?

     Propúxose ao alumnado analizar os movementos forzados da protagonista e comprender a realidade dos exilios, localizando nun mapa todos os lugares polos que pasou Adeline e investigar brevemente sobre os campos de concentración franceses, o papel das mulleres refuxiadas, ou a represión franquista. Tamén falamos sobre o papel das mulleres na medicina durante o século XX, e como Adeline, como profesional da saúde, rompe estereotipos da súa época.